Тағамдық талшық - өсімдік тектес тағамдардың құрамында болатын қоректік талшықтар. Олар аш ішекте толық дерлік қорытылмайды, бірақ ағзаның қалыпты жұмыс істеуінде маңызды рөл атқарады.

Тағамдық талшыққа бай рацион ас қорыту және жүрек-қантамыр жүйелерінің саулығын, зат алмасуды қолдауға көмектеседі, сондай-ақ 2-типті қант диабеті, колоректальды обыр және семіздік сияқты бірқатар созылмалы аурулардың даму қаупінің төмен болуымен байланысты.

Тағамдық талшық ағзаға не үшін қажет?
 Ішектің жұмысын жақсартады - ішектің тұрақты босауына ықпал етеді.
Ішек микрофлорасын қолдайды - тағамдық талшықтың кейбір түрлері пайдалы ішек бактериялары үшін қорек қызметін атқарады.
Тоқтық сезімін ұзақ сақтауға көмектеседі, өйткені талшыққа бай тағамдар баяу қорытылады.
Қандағы қант деңгейін бақылауға көмектеседі - еритін талшық көмірсулардың сіңуін баяулатады.

Тағамдық талшықты қайдан алуға болады?
Көкөністер: брокколи, сәбіз, қызылша, брюссель қырыққабаты, жасыл бұршақ.
Жемістер мен жидектер: алма, алмұрт, апельсин, киви, таңқурай, қаражидек.
Бұршақ тұқымдастар: үрмебұршақ, жасымық, ноқат, асбұршақ.
Жармалар мен тұтас дәнді өнімдер: сұлы жармасы, қарақұмық, булгур, арпа жармасы, тұтас дәнді нан және макарон өнімдері.
Жаңғақтар мен тұқымдар: бадам, пісте, зығыр және чиа тұқымдары.
Тағы бір жақсы көзі: авокадо.

ДДСҰ ересектерге тәулігіне кемінде 25 г тағамдық талшық тұтынуды ұсынады. Оны негізінен тұтас дәнді өнімдерден, көкөністерден, жемістерден және бұршақ тұқымдастардан алған дұрыс.

Әр грамын есептеудің қажеті жоқ. Қарапайым әдеттерден бастауға болады: негізгі тағамға көкөніс қосу, тұтас дәнді өнімдерді таңдау, бұршақ тұқымдастарды рационға жиі енгізу, жемістерді тұтас күйінде жеу, ал ботқа мен йогуртқа жаңғақ немесе тұқым қосу.

Егер бұрын рационыңызда тағамдық талшық аз болса, оның мөлшерін біртіндеп арттырып, жеткілікті мөлшерде сұйықтық ішуді ұмытпаған жөн.