Дүниежүзілік денсаулық сақтау ұйымының (ДДСҰ) құрамындағы Қатерлі ісіктерді зерттеу жөніндегі халықаралық агенттік (IARC) қатерлі ісік тудыруы мүмкін факторларды зерттейді. Олардың арасында сусындар ғана емес, вирустар, химиялық заттар, сәулелену және ауаның ластануы да бар. Факторлар канцерогендік әсеріне қатысты дәлелдердің сенімділігіне қарай төрт топқа бөлінеді.

 

 Бұл жіктеу сусындар туралы не дейді?

 1-топ. Алкоголь - канцерогендік әсері дәлелденген.

Сыра, шарап, арақ және өзге алкогольді ішімдіктер қатерлі ісіктің кемінде жеті түрінің, соның ішінде бауыр, ішек және сүт безі обырының даму қаупін арттырады.

 

 2А тобы. Өте ыстық сусындар - канцерогенді болуы ықтимал.

Температурасы 65 °C-тан жоғары шай, кофе және басқа сусындарды тұтыну өңеш обырының дамуымен ықтимал байланысына байланысты 2А тобына жатқызылған. Мәселе сусынның түрінде емес, оның температурасында.

 

 2B тобы. Аспартам - канцерогенді болуы мүмкін.

Кейбір қантсыз газдалған сусындардағы бұл тәттілендіргіш 2023 жылы шектеулі дәлелдер негізінде 2B тобына енгізілді. Бірақ бұл барлық Zero немесе Sugar Free сусындары осы топқа жатады деген сөз емес.

 

 3-топ. Кофе - канцерогендік әсеріне қатысты дәлелдер жеткіліксіз.

IARC кофені канцерогенді деп жіктеуге жеткілікті дәлел таппаған. Дегенмен оны өте ыстық күйінде ішуге қатысты қауіп бар.

 

Ал энергетикалық сусындар, шырындар және газдалған сусындар ше?

Қант қосылған және жасанды тәттілендіргіштері бар сусындар жеке санат ретінде бағаланбаған. Қант қосылған сусындарды тұтыну IARC-тың 2025-2029 жылдарға арналған бағалау басымдықтарына енгізілген. Бұл оларды шектеусіз ішу қауіпсіз деген сөз емес.

 

 Маңызды: IARC топтары қауіп деңгейінің рейтингі емес. Олар канцерогендік әсер туралы дәлелдердің сенімділігін көрсетеді. Сондықтан бір топтағы факторлардың қатерлі ісік тудыру қаупі бірдей болмауы мүмкін.

 

 Нені есте сақтау маңызды? Алкогольден бас тарту қатерлі ісік қаупін азайтуға көмектеседі. Ал ыстық шай мен кофені ішер алдында сәл суытып алған жөн.